अरविन्द कुमार यादव
रौतहट, २१ श्रावण । नेकपा माओवादी केन्द्रको भातृ संगठन अखिल क्रान्तिकारी महिला संघ रौतहटको जिल्ला अधिवेशन गरुडा बजारमा भव्य रूपमा सम्पन्न भएको छ ।
अधिवेशनले सर्वसम्मत निर्णय गर्दै यमुनामाई गाउँपालिका वडा नं १ चिकनाकी सीमा कुमारी पटेल अध्यक्ष पदमा चयन सर्वसहमत भएको हो।
२०७९ को स्थानीय तहको निर्वाचनमा उपाध्यक्ष पदकी प्रत्यासी रहनुभएकी पटेल ५१ सदस्यीय जिल्ला समन्वय समितिको नेतृत्व गर्ने भएकी छिन् । सहिद परिवारकी सदस्य पटेलको श्रीमानको ठूलो दाइ जनयुद्धको दौरान तत्कालीन सुरक्षाकर्मीको गोलीबाट सहादत प्राप्त गरेका थिए, जुन संघर्षको जगमै उहाँको नेतृत्व उभिएको छ ।
तराई–मधेशजस्तो क्षेत्रमा महिलाले राजनीतिक नेतृत्व गर्नु आफैँमा एक साहसिक निर्णय हो । समाजमा अझै महिलाप्रति संकुचित सोच कायमै रहेको अवस्थामा पनि पटेलले हर चुनौतीको सामना गर्दै आफूलाई संगठनात्मक रूपमा सबल बनाउँदै लगिरहनुभएको छ ।
सामान्य परिवारबाट राजनीतिमा उदाएकी पटेलले पार्टीको जुनसुकै गतिविधिमा सक्रिय सहभागीता जनाउँदै आएकी छिन् । उहाँको ससुराली घर यमुनामाई गाउँपालिकावडा नं १ चिकना भए तापनि, क्षेत्रको राजनीतिक, सामाजिक र विकास कार्यमा सक्रियता देखाउँदै आउनुभएको छ ।
अध्यक्ष पटेलको पहलमा संघीय राजधानी काठमाडौँदेखि मधेश प्रदेश तथा स्थानीय तहसम्म समन्वय गरी दर्जनभन्दा बढी विकास योजनाहरू गाउँमा पुर्याउन सफल हुनु भएको छ ।
२०७९ सालको स्थानीय निर्वाचनमा केही मतले पराजित हुनु भएपनि उहाँ जनताको विश्वास जित्न सफल भएकी एक उदाहरणीय सामाजिक कार्यकर्ता बनिरहनुभएको छ । “जनप्रतिनिधि नभएपनि जनताको दुःख–सुखमा सधैं साथ दिनुपर्छ भन्ने विश्वासका साथ म अघि बढेकी हुँ,” पटेलले बताउनुभयो ।
अध्यक्ष पदमा चयन भएपछि उहाँले भन्नुभयो, “महिलालाई राजनीति गर्ने वातावरण अझै सहज छैन । तर म नकारात्मक आलोचना वा समाजको संकुचित सोचको परवाह नगरी आफ्नो उद्देश्य र जिम्मेवारीप्रति प्रतिबद्ध छु ।”
सीमा कुमारी पटेलको नेतृत्वले महिलाहरूमा राजनीतिक सक्रियता र आत्मविश्वास बढाउने विश्वास गरिएको छ ।
