प्रदिप यादव
गौर (रौतहट), साउन १९ –
गौर नगरपालिका वडा नम्बर ४, गढवा टोलस्थित प्राथमिक विद्यालयमा विगत तीन वर्षदेखि व्यवस्थापन समिति गठन हुन सकेको छैन। व्यवस्थापन समिति विना सञ्चालन हुँदै आएको विद्यालयको शैक्षिक गुणस्तर, भौतिक पूर्वाधार, तथा नीति–निर्णय प्रक्रियामा समेत असर परेको स्थानियहरूको गुनासो छ।
विद्यालयको नियमित सञ्चालन र शैक्षिक अनुगमनमा महत्वपूर्ण भूमिका खेल्ने सो समिति गठन नहुनु नगरपालिकाको लापरबाही र सम्बन्धित निकायको उदासीनताको परिणाम भएको आरोप अभिभावक तथा स्थानीय अगुवाहरूले लगाएका छन्।
“हामीले पटक–पटक नगर शिक्षा शाखामा ध्यानाकर्षण गराएका हौं तर अहिलेसम्म कुनै पहल भएको छैन,” एक स्थानीय अभिभावकले बताए।
उनका अनुसार विद्यालयमा शिक्षकहरूको उपस्थिति नियमित छैन, छात्राहरूको संख्या घट्दो छ, र भौतिक सुविधाको अवस्था पनि कमजोर छ।
शिक्षक अभाव, शैक्षिक गतिविधिमा कम सहभागिता र स्थानीय जनताको चासोको कमीले गर्दा समिति गठनको प्रक्रिया समेत अलमलमा परेको देखिन्छ। विद्यालयप्रति समुदायको चासो र दबाब नहुँदा नगरपालिकाले पनि गम्भीरतापूर्वक नलिएको स्थानियको भनाइ छ।
नगर शिक्षा शाखाले भने छिट्टै प्रक्रिया अघि बढाइने आश्वासन दिएको छ।
“जस–जसको म्याद सकिएको छ वा समिति गठन नभएको विद्यालयहरूमा आवश्यक प्रक्रिया अघि बढाइँदैछ,” शाखा प्रमुखले भने।
विद्यालय व्यवस्थापन समिति विना विद्यालय सञ्चालन हुनु शिक्षा ऐन र नियमावलीको समेत उल्लङ्घन मानिन्छ। यसले शैक्षिक विकासमा गम्भीर असर पार्न सक्ने शिक्षा क्षेत्रका जानकारहरू बताउँछन्।