अरविन्द कुमार यादव
रौतहट, १९ श्रावण ।सरकारलाई करोडौं रुपैयाँ राजस्व संकलन गरिदिने ट्राफिक प्रहरीले आफू बस्ने कार्यालयको सुविधा भने अझैसम्म पाउन सकेका छैनन्। रौतहट जिल्लाको सदरमुकाम गौरमा रहेको ट्राफिक प्रहरी कार्यालय दुई दिनको वर्षाले जलमग्न बनेको छ।
वर्षौंदेखि गौरजस्तो प्रमुख शहरी क्षेत्रमा ट्राफिक प्रहरीको आफ्नै भवन नहुँदा कार्यालय कहिले करदाता सेवा कार्यालयमा त कहिले जीर्ण जिल्ला हुलाक कार्यालयको भवनमा सञ्चालन हुँदै आएको थियो। हाल हुलाक कार्यालयले भवन खाली गराएपछि ट्राफिक प्रहरी कार्यालयले गौर नगरपालिकाको वडा नं ३ मा अस्थायी रूपमा एक कोठा लिई कार्य सञ्चालन गर्दै आएको छ।
तर दुई दिनको अविरल वर्षाले उक्त कोठा पूर्णतः जलमग्न भएपछि ट्राफिक प्रहरी जवान र कर्मचारीहरू कठमाथि चढेर रात बिताउन बाध्य भएका छन्। कार्यालय, सुत्ने कोठा, शौचालय, भान्सा लगायतका सबै ठाउँमा पानी पसेको छ, जसले उनीहरूको दैनिकी कठिन बनाइदिएको छ।
खाना पकाउनेदेखि लिएर शौचालय प्रयोग गर्न समेत समस्या भएको अवस्था छ। राज्यको सुरक्षा संयन्त्रका प्रमुख अंगमध्ये पर्ने ट्राफिक प्रहरीको यस्तो दयनीय अवस्था रहेकोमा सम्बन्धित निकायहरू मौन रहनु गम्भीर विषय बनेको छ।
जिल्ला ट्राफिक प्रहरी कार्यालयको नाममा चपुरमा त सुविधासम्पन्न तीनतले भवन निर्माण भइसकेको छ, तर सदरमुकाम गौरमा भने ट्राफिक प्रहरीलाई सामान्य बसोबास र कार्यालय सुविधा समेत उपलब्ध गराइएको छैन।
स्थानीय तह तथा सरोकारवाला निकायको ध्यान यतातिर जाओस् भन्ने अपेक्षा ट्राफिक प्रहरीहरूसहित आम नागरिकको छ।
